Nagapadayon ang imbestigasyon sang Mambusao Municipal Police Station sa kamatayon sang isa ka amay nga ginluthang samtang nagakatulog sa sulod sang iya kwarto sa Sitio Nabungan, Brgy. Maralag sang tinalikdan nga Hulyo 24.
Matandaan, ginkilala ang biktima kay alyas “Ismael”, 50-anyos. Nag-angkon ini sang pilas sa natuo nga dalunggan, guya kag butkon. Suno kay Police Lieutenant Shaney Allanic, hepe sang Mambusao MPS, nga may yara na sila sang person of interest sa nasambit nga krimen apang indi pa nila ma-isapubliko bangud ginapaidalom pa sa maid-id nga imbestigasyon.
Dugang pa ni Allanic, wala man sang record sa barangay ang biktima apang nagamaoy ini kun mahubog. Indi man nila sa karon ma-istorya ang menor de edad nga bata sang biktima bangud yara pa ini sa state of shock. Nahibaluan, ang bata nga babayi ang nakakita sa iya amay nga nagapaligo na sang dugo kag wala na sang kabuhi.
