LEGAZPI CITY – Nadismaya ang caretaker ng Dalipay River sa Brgy. Cawayan, bayan ng Manito, Albay matapos na maging kulay tsokolate o putik ang ilog na dating dinarayo dahil sa linaw at linis ng tubig nito.
Sa panayam ng Brigada News FM Legazpi kay Maria Llamera Mayores, sinabi niya na nakaapekto rito ang ginagawang kalsada sa bundok.
Aniya, sikat ang kanilang ilog doon dahil bukod sa pinapasyalan at pinagliliguan, dito rin naglalaba ang mga residente at humuhuli ng isda para may pang-ulam, subalit ngayon ay hindi na at wala na rin silang kita dahil wala na ring pumupunta roon.
Panawagan ni Mayores, sana ay matulungan sila na maibalik ang dating malinaw at malinis na tubig ng ilog dahil para rin naman ito sa lahat.
