ANAM anam na nga mikunhod ang ihap sa mga trisikel drivers nga gapamasada sukad nga nagsige og taas ang presyo sa gasolina.
Segun ni Joshue Fernandez, federation Vice president sa Tricycle Operators and Drivers Association nga gikan sa 100 ka miyembro sa ilang grupo, anaa na lang karon sa 60 ang nabilin nga gapamasada, samtang sa ubang TODA, nikunhod usab ang nagabiyahe tungod sa kamahal sa gasolina ug sa kakulang sa ayuda gikan sa lokal nga panggamhanan.
Hangyo ni Fernandez nga unta may ayuda usab ang mga trisikel drivers gikan sa lokal nga panggamhanan aron dili masobrahan ang kalisod, sama sa ubang unit sa public utility nga aduna silay suporta gikan sa national government.
Gihulat usab nila karon nga maaprobahan ang P15 nga pletihan sa kada pasahero gikan sa P10 sa karon ug mahimo usab nga mapuno na ang trisikel sa pasahero sama sa multicab ug jeepney.
Sa karon giangkon ni Fernandez nga ang ubang mga trisikel driver ang mibalhin na sa ubang trabaho tungod sa kanihit sa income sa pamasada.
