MIUBOS ang kaso sa lugos o rape nga natala sa kapulisan sa unang tulo ka bulan karong tuiga tandi sa samang panahon nakalabay’ng tuig.
Ang rape kauban sa murder ug homicide cases nga nakitaan sa kapulisan og pag-ubos sa ihap base sa ilang datus.
Sa datus gikan sa GenSan City Police Office (GSCPO) Women’s and Children Protection Desk (WCPD) Enero 1- Marso atong 2021 nakatala sila og 12 ka kaso samtang upat karong tuiga.
Matud ni PCol. Paul Bomitivo, acting police director sa GSCPO sagad sa kaso nahitabo samtang naa sa impluwensiya sa ilimnong makahubog ang suspek, higala online ug silingan.
Luyo niini, nakitang rason sa pag-ubos sa kaso sa pagpanglugos mao ang pagpakusog sa information dissemination kalabut sa pagpangabuso sa babaye ug bata.
Sagad sa mga biktima ang gilugos sa balay, inn, gipugos, gibaharan ug gi-hadlok.
Samtang lakip sa mga taho sa rape cases karong tuiga mao ang pagpanglugos ug pagpatay sa 5-anyos nga batang babaye sa 50-anyos nga lalaking biyudo atong Sabado. I Richel Gubalani
