Nagapangayo it hustisya ro pamilya it tricycle driver nga nakit-an nga patay sa Sitio Looban, Barangay Camanci Norte, Numancia, Aklan.
Namatay bangud maabong mga nina sa pagbuno ro 39-anyos nga si Wilfredo Peralta Tamayo Jr.
Si Tamayo hay taga-Barangay Mangan, Banga, Aklan ag temporaryo nga naga-uli sa Purok 4, C. Laserna, Barangay Poblacion, Kalibo.
Napansin it mga pulis ro mga mantsa it dugo sa likod it waiting shed pilang metro ro eayo halin sa kung siin nakit-an ro bangkay. Nagapati ro mga otoridad nga nagdaeagan ro biktima matapos rayang bun-on hasta sa bumagsak sa eugta ag namatay.
Narekober it mga kapulisan ro tricycle ni Tamayo nga gin-abandona sa sangka kakahuyan sa Sitio Pigado, Barangay Bakhaw Sur, Kalibo maeapit sa sambilog ka dumpsite.
Sa sambilog ka closed circuit television footage nga nabuoe it pulisya, makit-an nga indi magnaba sa tatlo ka mga eaeaki ro nagsakay sa tricycle ni Tamayo agud makapaeagiw matapos ro krimen.
Presente nga nagapangayo it bulig sa publiko ro pamilya ni Tamayo sa insigida nga pagdakop ir mga suspek agud mataw-an it hustisya ro pagkamatay it biktima./JIL B. LACSON
