Magabueoligan ro tatlong ahensya it gobyerno sa implementasyon it Housing project para sa mga naapektuhan it proyekto it gobyerno sa Kalibo International Airport (KIA).
Ro nasambit nga mga ahensya hay ro Department of Transportation (DOTr), LGU Kalibo ag Department of Human Settlements and Urban Development (DSHUD).
Ro nasambit nga proyekto hay nagabalor it P246 milion ag 180 units ro masarangan nga igapatukod sa sueod it daywa ka ektaryang lote sa Barangay Tigayon, Kalibo.
May pagahimuon nga evaluation para sa mga magiging benepisyaryo ag kung engkaso nga magkueang ro inisyal nga pondo hay magapangayo it dugang nga alokasyon sa DOTr.
Pagaumpisahan man ro pagkaayad it mga patakaran sa re-settlement project bangud sa notice to proceed pa eamang ro pagasundon nga tikang sa implementasyon it proyekto.
Samtang, may mga ginpahaum man nga proyekto ro DOTr kaparehu it livelihood trainings ag oportunidad nga makapag negosyo ro mga iga-relocate sa pakikipagbueoligan sa Technical Education and Skills Development Authority (TESDA). // ANN DESLENE SALAZAR
