Nakumpiskar sang Meat Inspection Team ang hot meat nga gintuyo pasulod sa Teodoro Arcenas Trade Center (TATC) sang damlag lang.
Ini matapos nga madakpan sang Market Security Personnel nga wala sang stamp ang baboy nga nagapamatuod nga wala makaagi sa inspeksyon kag katay sa slaughter house.
Sa interview sang Brigada News FM Roxas City kay Efren Diaz, Chief guard sang TATC, ginpahayag sini nga pasado alas 2:00 sang kaaganhon sang Sabado nagpadulong na ini sa nasambitan nga merkado agud i-monitor kag i-briefing ang iya mga tinawo.
Apang, ila nadiparahan ang isa ka tricycle nga may karga nga duha ka sako kag may unod nga baboy.
Ginpangitaan nila ini sang resibo gikan sa slaughter apang napaslawan naman ang driver sang tricycle nga magpresentar kag didto nadiskubrehan nga ginkatay lamang ini sa likod sang ila puluy-an sa may bahin sang Brgy. Inzo sining syudad.
Nahibaluan nga ang nagapanag-iya sang nasambit nga baboy amo si Rafael Ame nga isa man ka vendor sa TATC.
Suno pa kay Diaz nga gilayon nila ginlubong ang nakumpiskar nga karne sang baboy lakip ang mga kasudlan.
Dugang pa sini, nga posible magapangatubang sang nagakaigo nga sanction ang tag-iya sang baboy base sa ordinansa nga ginapatuman may kaangtanan sa pagbaligya sang karne sa idalom sang nagapadayon nga African Swine Fever (ASF) crisis.
Nagpanugyan man ini sa mga pumuluyo nga nagabakal sa TATC nga siguraduhon nga may yara sang tatak kag Meat Inspection Certificate (MIC) halin sa Slaughter House ang ila ginabakal nga karne. | Judy Ann Juare
