Patay ang 29-anyos nga hinablos matapos ginluthang sang iya man lang kaugalingon nga tiyo sa Sitio Ilaya Barangay Matnog, Ivisan, Capiz.
Ginkilala ang biktima kay Roel Varcas, kasado, samtang ang suspek amo si Garry Varcas, 40-anyos, chief tanod kag miyembro sang bantay dagat lunsay mga residente sa nasambit nga Barangay.
Sandig sa imbistigasyon sang Ivisan PNP, ginapahayag nga samtang naga-inom sang makahulubog nga ilimnon ang magtiyo upod ang pila pa nila ka kaupdanan hinali lang nagpatunga ang mainit nga pagbinaisay may kaangtanan sa mga propiedad.
Gina-alegar nga ginbuno una sang hinablos sa likod ang suspek gamit ang isa ka screw driver rason nga naggabot ang tiyo sang armas kag ginluthang ang biktima.
Ginpadangat pa sa ospital ang biktima apang gindeklarar ini sang doktor nga dead on arrival.
Sa karon, padayon man nga ginabulong sa ospital ang suspek kag ginahulat ang desisyon sang asawa sang napatay kun mapasaka ini sang kaso batuk sa ila tiyo. | KMD Gicalde
