KABANKALAN CITY, Negros Occidental — Bilang isa ka bata nga nag dako sa isa ka pigado nga pamilya kag komunidad, indi bag-o ang panaysayon nga “ang pag-eskwela para lang sa may mga kwarta.”
Apang isa si Jelord Jayme Medes, isa ka miyembro sang Tribu Bukidnon sa Sitio Balatogan, Barangay Buenavista sa syudad sang Himamaylan, ang nag-pamatuod nga ang ingrediente sa pag-kuha sang handum sang isa ka tawo, amo ang pag panghimakas sa kabuhi.
Bisan nag-dako sa isa ka pigado nga pamilya, nangin inspirasyon ini ni Jelord agud makatapos sa kolihiyo, para maka-pangita sang ubra nga e-bulig sa iya mga ginikanan nga mga lunsay mga mangunguma.
Gin-gamit ni Medes ang iya ihibalo sa pag-ubra sang mga handcrafted products parihas sang kalo, bag, food tray, lampshades, kag iban pa, gamit lamang ang mga materyales nga makit-an sa ila lugar, parihas sang nito, kawayan, kag kugon. Naga-ubra man si Medes sang mga artworks kun kinahanglan, agud ang iya ma income amo ang iya paga-gamiton sa iya pag-eskwela sa Central Philippines State University.
“Bangod sang amon kapigaduon, na agyan ko mag serbisyo sa masobra tatlo ka tuig sa akon teachers sang high school paagi sa pagsugat kag dul-ong sa ila, para indi na mabudlayan akon ginikanan sa pag pa-eskwela sa akon,” pahayag ni Medes.
Sa Agosto subong nga tuig, natalana na nga maga-gradwar si Medes sa kurso nga Bachelor in Physical Education. Sa karun, isa man ka Sangguniang Kabataan official si Medes sa iya Barangay sa nasambit nga syudad.*