BICOL—Inarestar kan pinagsanib na pwersa kan CIDG Albay Provincial Field Unit, Sto Domingo Municipal Police Station asin iba pang mga unit kan PNP sa Bicol an Secretary General kan BAYAN Bicol asin pastor kan United Church of Christ in the Philippines na si Pastor Dan Balucio.
Dinakop si Pastor Dan sa residensya kaini sa Brgy. San Antonio, Sto. Domingo, Albay Dominggong maaga.
Sa report kan Albay Police Provincial Office, sinerbihan nin search warrant si Pastor Dan para sa kasong pagbalgar sa Republic Act No. 10591 o “Comprehensive Firearms and Ammunition Regulation Act” asin Republic Act No. 9516 o “Laws On Illegal/Unlawful Possession, Manufacture, Dealing, Acquisition or Disposition of Firearms, Ammunition or Explosives or Instruments used in the Manufacture of Firearms, Ammunition or Explosives.
Narekober sa digdi an sarong “Remington Brand Inc.” kalibre .45 pistol asin sarong stainless steel magazine na kargado nin pitong bala; sarong itom na holster; sarong steel magazine para sa M14 na may laog na 16 na bala para sa caliber 7.62 mm; sarong magazine na may walong para sa nasambit na kalibre nin badil; sarong fragmentation hand grenade na nasa itom na canister; asin sarong pulang badera na may nakasurat na “BAGONG HUKBONG BAYAN”.
Katakod kaini, ipinahayag kan Karapatan Bicol na planted an mga nasambit na armas urog pa suboot ta 30 minutos antes na mag-abot an mandatory witnesses, luminaog na sa pig-iistaran ni Pastor Dan sa Shannan Christian Academy sa Brgy. San Isidro, banwaan nin Sto. Domingo an nasa 30 elementos kan PNP.
Mientrastanto, ipinahayag pa kan grupo na nilaog man kan nasa 40 elemento kan PNP asin CIDG an harong kan 2nd year Bicol University student asin Spokesperson kan Youth Act Now Against Tyranny (YANAT)-Bicol na si Justine Mesias sa banwaan nin Daraga kan parehong aldaw. Tinutukan suboot kan mga ini nin badil an mga nasa harong asin hinalughog an mga gamit nin maduwang oras. Makalihis kaini, nakuanan suboot nin badil asin pampasabog kan mga operatiba an harong mantang dae man kan mga ini naabutan sa lugar si Mesias.
Katakod kaini, nagpaluwas man nin paglilinaw si PCOL. ATTY ARNOLD SANTIAGO, Provincial Director kan Albay PPO kun sain ipinahayag kaini na sala an mga akusasyon kan Karapatan Bicol asin nanindugan na dae sinda naghihiro nin suhay sa ley.
May proseso suboot an ley poon sa pag-apply nin Search Warrant sa husgado, kun sain pig-aadalan suboot ini nin marhay kan huwes antes ipigtatao sa pulis.
May mga witness man suboot sa mismong pagkondusir kan mga operasyon kun kaya dae man suboot lugod pag atian kan “Karapatan Bikol” Facebook page an saindang kamawotan na maging matoninong an probinsya nin Albay, imbes makisumaro na sana sa pagsikwal kan mga salang ideolohiya na pigpapalakop kan komunistang grupo.#