CAMARINES NORTE- Umaabot sa 58 motorista ang hinuli at naisyuhan ng ticket ng Basud Municipal Police Station mula Pebrero 1 hanggang Marso 29 dahil sa paglabag sa Republic Act 4136 o mas kilala bilang Land Transportation and Traffic Code.
Batay ito sa datos ng naturang Municipal Police Station hinggil pa rin sa kanilang kampanya na maging ligtas ang kalsada lalo na ang Maharlika Highway.
Sa loob ng naturang panahon 115 ang ginawang operasyon ng PNP kung saan naisyuhan ang mga ito ng Traffic Citations Ticket at 7 Temporary Operators Permit.
Limang motorsiklo naman ang na- impound na bunga ng mga isinagawang operasyon.
Ang hakbang na ito ng PNP ay bunsod ng mataas na bilang ng mga nanangyayaring aksidente sa kalsada.
Nakatulong naman ang isinasagawang Comelec checkpoint dahil na rin sa presensya ng mga awtoridad.
Una nang inihayag ng PNP na hindi pwedeng maglagay ng permanenteng barikada sa kalsada.
Importante umano ang presensya ng mga pulis at ang ginagawang oplan sita.
