KORONADAL CITY- UMABOT na sa P 119.3 million ang nai-release na pondo ng Department of Labor and Employment o DOLE Region 12 sa ilalim ng COVID 19 Adjustment Measures Program o CAMP.
Nakinabang dito ang 23,859 na mga trabahante na apektado ng pandemic.
Sa datos ng DOLE 12, 23,810 sa mga ito ay mga benepisyaryo ng CAMP 1 at CAMP 2 noong 2021 habang 49 naman sa CAMP 3.
Ang mga benepsiyaryo ay nakatanggap ng one-time cash assistance na P 5,000.
Inihayag ni DOLE 12 assistant regional director Arlene Bisnon na kaunti na lamang ang nakabenepisyo sa CAMP 3 dahil nasa Alert Level 2 na ng COVID 19 response ang Soccsksargen.
Ang CAMP 3 ay para sa mga pribadong establisemento o mga empleyado na naapektuhan ng pagsarado ng kanilang mga kompanya, retrenchment, work suspension o temporary closure ng kanilang pinagtatrabahuan dahil sa implementasyon ng Alert Level III, o mas mataas pang alert level sa kanilang lugar na ipinatupad noong Enero.
