Posible nga mapasakaan sang kaso kag makakasan sang lisensya ang guwardya nga aksidente nga nakapitik sang gatilyo sang iya 9mm pistol nga ginalimpyohan samtang yara sa iya post sa isa ka bangko sa bahin sang Arnaldo Boulevard, Roxas City.
Suno kay Police Chief Master Sergeant Ramil Arcangeles, nakadependi sa mga biktima nga napilasan kun desidido ang mga ini nga magpasaka sang kaso kag nakadependi man sa security agency kun ano nga penalidad ang ila ipapanaog batok sa guwardiya bangud nagaguwa sa imbestigasyon nga indi man hungod ang pagpalupok sang armas-luthang.
Matandaan, nag-angkon sang pilas sa tiil ang mga kliyente nga babayi kag lalaki samtang pilas sa palad naman ang naangkon sang guwardiya nga nakapitik sang gatilyo sang armas. Sa karon, ginahulat nalang ang desisyon sang duha ka biktima kun magapasaka sang kaso batok sa guwardya. | Judy Ann Juare
