Nagaguwa sa imbestigasyon sang Roxas City Police Station nga may yara sang lapses ukon sala nga nahimo ang security guard sang isa ka bangko nga aksidente nga nakapitik sang gatilyo sang iya service firearms kag nagresulta sang accidental firing.
Suno kay Police Chief Master Sergeant Ramil Arcangeles, indi nagakadapat nga maglimpyo sang service firearms kun on-duty na bangud posible nga makatuga sang aksidente. Dugang pa sini, dapat limpyohan na nga daan ang service firearms antes magbukas kag mag-pwesto sa ginatrabahuan.
Base naman sa pahayag sang guwardiya nga gin-switch niya ang selector sang 9mm pistol apang wala nag-on kag aksidente nga napitik sang iya tudlo ang gatilyo sang armas rason nga lumupok sa iya palad kag lumapos kun sa diin naiguan niya sa tiil ang duha ka kliyente nga lalaki kag babayi nga lunsay ginpadangat sa ospital para sa nagakaigo nga pagbulong. | Judy Ann Juare
