Agaran na ring hinihiling ni Senate President Pro Tempore Jinggoy Estrada sa Department of Foreign Affairs (DFA) ang pagkansela sa pasaporte ni dismissed Bamban, Tarlac Mayor Alice Guo.
Ito ay sa gitna ng balitang lumipad na ito papuntang ibang bansa gamit ang kanyang Philippine passport.
Anya, tiwala naman siyang sapat na ang mga patung-patong na kaso laban kay Guo upang ipawalang bisa ang kanyang pasaporte.
Samantala, ipinanawagan din niya sa National Bureau of Investigation (NBI) na hilingin na sa International Criminal Police Organization (Interpol) ang pagsama sa pangalan ni Guo sa red notice.
Ang red notice ay tumutukoy sa isang international request o alerto na nagbibigay impormasyon tungkol sa isang tao na hinahanap para sa criminal offense para sa kanilang pagkaaresto.
