Naniniwala ang kampo ni dismissed mayor Alice Guo na malabo namang nakalabas na ito ng Pilipinas, taliwas ng sinabi nina Senator Risa Hontiveros at ng PAOCC na kung saan-saang bansa na ito nakarating.
Sabi ni Atty. Stephen David, counsel ni Guo, nakausap pa niya ang kaniyang kliyente kahapon at sinabing nasa Pilipinas pa ito.
Muli ring kinumpirma ni David na humarap pa si Guo sa isa pa niyang abugado para manumpa ng counter-affidavit.
Ibig-sabihin nito, malabong raw na nakalipad na ito noong July 18 papunta sa Malaysia, bago magtungo sa Singapore at pa-Indonesia.
Sa kabila niyan, idiniin ni David na kung siya ang tatanungin – ang payo niya kay Guo ay magpakita ng proof of life na nasa Pilipinas pa rin siya.
Sa isa namang panayam, kinumpirma rin ni Atty. Elmer Galicia, na nakausap pa niya nang personal si Guo.
Maaalalang siya ang nag-notaryo ng kaniyang counter-affidavit.
Dahil dito, ipatatawag na rin siya sa susunod na pagdinig ng Senado.
