Gina-agda kang Civil Service Commission (CSC) Antique Field Office ang tanan nga mga concerned national government agencies, mga institusyon, kag tanan nga mga interesado mag-intra sa tree growing for a cause activity sa paraabuton nga Setyembre 19 sa Sitio Catwayan, Patnongon.
Ginpahayag ni CSC Antique provincial director Andre Ladigohon nga sanda ang maga-umpisa kang tree growing for a cause bilang kabahin kang andang Pamanang Lingkod Bayani Program nga may tinutuyo magtugro bulig pinansyal sa mga pamilya kang mga empleyado sa gobyerno nga nagtaliwan bangud sa pagserbisyo.
Ang dyang aktibidad ang may registration fee kang P250 sa diin igaremit dya sa CSC Central Office agud itugro sa mga pamilya nga kwalipikado.
Dya man ang patigayunon sa bulig kang Provincial Environment and Natural Resources Office (PENRO) kang Department of Environment and Natural Resources kag ana ka dyang provincial government counterpart.
Ang nasambit nga aktibidad ang may tema “Malasakit sa Kalikasan, Malasakit sa Lingkod Bayani,” nga nakalinyada man sa pagsaulog kang 124th Philippine Civil Service Anniversary kag “Linggo ng Malasakit.”
