Madinalag-on ang ginhiwat nga Grand launching and blessing sang 107.3 Brigada News FM Roxas City, Capiz kahapon nga adlaw sang Lunes, Agosto 28, 2023.
Una diri, nagpatigayon sang caravan kun sa diin naglibot sa pila ka mga barangay sa syudad sang Roxas upod sa aton ang mga sister stations gikan sa Western Visayas ini amo ang Brigada News FM Antique kag Kalibo.
Ang blessing ang ginpangunahan ni Rev. Father Robel G. Gicole.
Nagtambong sa nasambit nga kahiwatan sanday Roxas City Mayor Ronnie Dadivas, Atty. Abeb- The tree hugger, City Councilor Rey Magallanes, Brgy. Captain Nelson Ignacio kun sa diin naghatag ang mga ini sang mensahe kag pagpanginbulahan sa BNFM Roxas bilang bag-o nga kapartner sa paghatag sang impormasyon kag balita nga dapat mahibaluan sang mga pumuluyong Capisnon.
Yara man ang presensya sang aton Visayas Area Manager nga si Mr. Raul Del Prado, Mr. Joemer Soriano – BNFM Kalibo Manager, Mr. Arnel Vicente – BNFM Antique Manager kag madamo sang iban pa.
Nagpalab-ot man sang audio message si Mr. Cresenciano Pedrola Jr., General Manager sang Brigada Mass Media Corporation.
Nagapasalamat gid kami sa inyo bug-os nga suporta, apisar maulanon ang panahon nabatyagan namon ang inyo mainit nga pagbaton.
Mga Ka-Brigada, ginasiguro namon nga indi lang kami magadul-ong sang kalingawan, impormasyon kag balita kundi magahatag man kami sang boses kag serbisyo publiko sa mga nagakinahanglan. | Judy Ann Juare
