Ginmando ni Capiz Governor Fredenil Castro nga ipaidalom sa maidid nga imbestigasyon ang Mambusao District Hospital agud matumod kun may yara ini sang kakulangan ukon sala sa kamatayon sang mag-iloy.
Sa interview sang Brigada News FM Roxas City kay Atty. Luvim Amores, Capiz Provincial Information Officer, iya ginpahayag nga nagsiling si Gov. Castro nga dapat wala sang whitewash ukon tabon-tabon sa mga nakasala bangud luyag sini nga malimpyohan ang pangalan sang ospital, kag mapasanyog ang health services sa probinsya ilabi na sa paghatag sang serbisyo sa mga pumuluyo nga nagakinahanglan.
Suno kay Amores, magatukod sang Investigative Commission ang talatapan sang gobernador nga amo ang magapangamot sa pag-imbetigar sa nasambit nga ospital.
Dugang pa sini, bukas man ang gobyerno probinsyal sa himata sang biktima kun ini ang magapangayo sang bulig bangud wala nagapili ang gobernador sa iya nga buligan.
Ginasiguro man sini nga mapanabat ang may sala sa nasambit nga hitabo. | Judy Ann Juare
