IPADUOL sa katawhan ang serbisyo sa gobyerno ug idirekta ngadto sa mga barangay sa Sarangani Province.
Kini ang gipasibaw ni Sarangani Gov. Ruel Pacquiao atol sa iyang pakigtagbo sa mga municipal mayors ug mga partner agencies sa provincial government aron hisgutan ang mga long-term plans sa bag-ong administration.
Kabahin sa mga programa ang paghatag og kahumanan sa gitawag ni Pacquiao nga “monster of poverty” sa Sarangani.
Aron makab-ot ang katumanan sa mga programa ug proyekto nga mugnaon, gitukod ang Ronda Probinsya, nga maoy flagship program sa Pacquiao administration.
Suportado usab sa mga municipal mayors ug mga ahensya sa gobyerno ang mga programa ug proyekto nga giplastar sa gobernador.
Gipaniguro usab ni Pacquiao sa mga mayor nga ang mga plano nga ilang natuki ang mahimuan og igong aksyon alang sa kaayohan sa mga katawhan sa probinsya.
Una na usab nakigtagbo si Gov. Pacquiao sa mga representante gikan sa Development Academy of the Philippines alang sa mga sogyot ug plano alang sa pagpalambo sa ekonomiya sa probinsya.
