GIBISITAHAN ni Sarangani Governor Ruel Pacquiao ang mga lugar nga apektado sa kusog nga pag-ulan hinungdan sa pagbaha sa pipila ka barangay sa Alabel sa maong probinsya.
Kauban ni Pacquiao silang Board Member Joseph Calanao ug Provincial Administrator Atty. Ryan Jay Ramos.
Giadtoan nila ang Barangays Maribulan, Ladol ug Bagacay ug pipila ka lugar nga apektado sa pagbaha.
Ang team miadto usab sa Alabel Municipal Gym ug Barangay Ladol Gym, asa sumala ni Provincial Social Welfare and Development officer Raquel Panal, mokabat sa 60 ka pamilya ang mihiklin.
Giawhag usab ni Pacquiao ug gipahimangnuan ang mga apektadong pamilya nga karong panahon sa ting-ulan, kinahanglan gayud ang magbinantayon ilabi na sa mga flood prone areas.
Dugang sa gobernador nga gina-assess na sa provincial government ang mga gibahaan nga lugar ug mga pamilyang apektado aron sayron kung unsa ang gikinahanglang tabang.
Nang-apod apod usab og 500 food packs ang DSWD-12 lakip na 500 sleeping kits ug 10 modular tents sa apektadong pamilya, samtang ang provincial government sa Sarangani ang nang-apod apod og 100 ka sako sa tag 25 ka kilos nga bugas.
