Nagsugod na ang administrasyon ni Governor Fredenil Castro sa pagdihon sang nagakaigo nga tikang agud mapahangan-hagan ang negatibo nga epekto sang El Niño sa probinsya.
Bangud sa nasambit nga weather phenomenon, ginalauman nga pagatunaan ini sang rice shortage nga resulta man sang manubo nga stocks sang bugas kag epekto sang El Niño sa karon.
Bilang aksyon sang gobyerno nga pagdumalahan agud malikawan ini, ginhinyo ni Gov. Castro sa mga Sangguniang Panlalawigan Members nga ginapamunuan ni Vice Gov. Mitang Magbanua nga tun-an sang maid-id ang mga nagakadapat nga himuon agud mabantayan kag mapahagan-hagan ang pagdala ukon pagbaligya sa guha sang probinsya sang mga produkto nga palay ukon bugas.
Sa ginhiwat nga sinapol sang Committee of the Whole nga ginpangunahan sang Committee on Agriculture, gintalakay dire amo ang isa ka Executive Order (EO) agud ipapasar nga ordinansa para mahatagan sang katumanan ang ini nga layi.
Isa ini sa ginatan-aw nga pamaagi agud malikawan ang indi maayo nga epekto sa suplay sang bugas subong man mapunggan ang rice shortage sa probinsya bangud sang El Niño.
Sa karon, padayon nga ginatun-an sang bug-os nga komitiba ang EO bag-o iduso sa SP para wala na sang mangin problema sa pagpapasar sini.
