Nagpaabot ng pakikidalamhati si Senator Christopher Bong Go sa naiwang pamilya at mga kaibigan ni dating Pangulong Benigno Noynoy Aquino III.
Sa isang pahayag binalikan ni Go ang ilang mga pagkakataon na kasama nila ni Pangulong Rodrigo Duterte si PNoy.
Ayon kay Go noong 2010 noong tumakbo itong pangulo sa eleksyon ay ikinampanya pa nila si PNoy bilang pagtanaw ng utang na loob ng noo’y alkalde ng Davao sa pamilya Aquino.
Nakakalungkot lamang ayon kay Go na sa batang edad ay pumanaw ang dating Pangulo.
Inalala naman ni Go na noon ay palagi silang nagbibiruan ni PNoy kung saan palagi siyang tinutukso dahil kamukha siya ng isang dating Cabinet Secretary.
Dagdag pa ni Go, tuwing nagtutungo ng Davao City ang dating Pangulo ay pinadadalhan pa niya ito palagi ng chilicon carne na paborito nitong kainin sa eroplano.
Inihayag naman ni Go na kung magkakaroon ng pagkakataon ay posibleng dumalaw siya sa burol ng dating Presidente.
