PATAY ang usa ka 55-anyos nga Ginang human gidunggab sa mismong kaipon sulod sa ilang panimalay sa Purok 10, Brgy. Tacunan, Tugbok District Davao City pasado alas syete ang takna sa gabie sa miaging Domingo Hunyo 2 ning tuiga.
Sa report sa Tugbok Police Station, giila ang biktima nga usa ka Emilia Fuentes Abo-abo, walay trabaho nga residente sa maong lugar. Gitudlong suspek sa krimen mao ang kaipon niining si Sergio Pornolles Xavier nga daling niikyas human napatay ang Ginang.
Sa imbestigasyon, ayha ang krimen dungan pa nga nakig-inum ang maglive-in partner sa ilang mga higala sa usa ka construction site sa Mintal ug niuli bandang alas singko sa hapon.
Apan pagkagabie, pasado alas syete sa gabie nadungog sa ilang silingan nga giilang si Rodilyn ang syagit sa biktima nga nagpakitabang. Nakita sa saksi ang suspek nga si Sergio nga giguyod ang lawas sa biktima sa hagdanan gikan sa ikaduhang andana sa ilang balay dayon niikyas.
Narekober sa mga niresponding mga pulis sa Tugbok sa crime scene ang usa ka kitchen knife samtang ang biktima naabtang nakakulob ug wa nay kinabuhi nga dunay dinunggaban sa dughan ug agtang lakip sa iyang mga kamot nga timailhan nidepensa sa kaugalingon.
Sa karon panawagan sa mga kabanay sa Ginang ang hustisya ug madakpan gilayon ang niikyas nga suspek aron mapanubag sa salaud.BNFM-DAVAO