Patuloy ang pagsigla ng ekonomiya ng bansa sa unang tatlong buwan ng taon kasunod ng mga pagluluwag sa COVID-19 restrictions.
Sa inilabas na report ng Philippine Statistics Authority, lumago ng 8.3 porsiyento gross domestic product (GDP) ng Pilipinas para sa unang quarter ng 2022.
Ito ay sa kabila ng paglitaw ng omicron variant noong Enero na humantong sa paghihigpit ng mga restrictions na pinaluwag din pagsapit ng Pebrero.
Noong 2021, lumago ang ekonomiya ng 5.6 porsyento, bagama’t bahagyang lumampas sa mga target mas mababa pa rin ito sa antas ng paglago bago ang pandemya.
Una nang sinabi ni Socioeconomic Planning Secretary Karl Kendrick Chua na ang ekonomiya ay maaaring bumalik sa pre-pandemic growth nito ngayong taon dahil sa pagluluwag ng mga restrictions.
