Patay ang usa ka ginang human kini gipusil sa wala ilhing mamumuno sa Rabaya Street, purok Matinahuron, sa barangay Tabunok, sa dakbayan sa Talisay, Cebu.
Giila ang biktima nga si Leonora Carlos, 57 anyos, residente sa nahisgutang lugar.
Ang biktima mao ang kanhi market administrator sa Tabunok Public Market sa maong syudad.
Sa inisyal nga imbestigasyon sa Talisay City Police Station og sa Scene of the Crime Operatives nga maoy mi-responde sa nahitabong pagpamusil, nasayran nga paingon na unta manirado sa iyang tindahan ang biktima dihang giduol kini sa usa ka lalaki diin nakit-an pa sila nga nag-estorya.
Sa wala masayri nga hinungdan, giingong kalit lang nga gipusil si Carlos sa maong lalaki diin naigo kini sa iyang ulo nga maoy hinungdan sa iyang hinanaling kamatayon. Sa pagkakaron, gisusi na sa mga otoridad ang mga CCTV duol sa lugar aron masayran kung si kinsa ang responsible sa kremin og padayon usab ang ilang gihimong imbestigasyon aron masayran ang motibo sa pagpamusil.
