Reymund Titong
KABANKALAN CITY, Negros Occidental — Bag-o magtakop ang deadline sang pag-file sang Certificate of Candidacy (COC), ginsurpresa ni anay Negros Occidental Vice Governor Genaro “Lim-ao” Alvarez, Jr., ang publiko sang iya pag-file sang kandidatura bilang independiyente nga kandidato sa pagka mayor sa syudad sang Kabankalan.
Si Alvarez, nga kilala sa iya denikada nga experiensya sa politika, magapadalagan batok kay anay Negros Occidental governor Isidro Zayco, incumbent mayor Benjie Miranda, kag iban pa nga mga kandidato nga amo sanday Elezer Doron Jr., John Cordero, Leo Oquias, kag Florelyn Mungaray.
Kun balikan ang mga tion sa politika ni Alvarez, nangin isa siya ka congressman sang ika-anum nga distrito sang pila ka termino kag nangin bise gobernador man sang probinsya sa pila ka tuig.
Ini ang una nga higayon nga nagsulod si Alvarez sa politika sa Kabankalan, nga sa kasaysayan sang syudad kilala bilang balwarte sang mga pamilya Zayco.
Amay si Alvarez ni incumbent 6th district representative Mercedes Alvarez-Lansang, Ilog Mayor John Paul Alvarez, kag Ilog Vice Mayor Genaro Rafael K. Alvarez III. Apo man ni Alvarez si Sipalay Councilor Ralf Alvarez, nga magapapili bilang Board Mamber sa ika-anum nga distrito sang probinsya sa 2025 local elections.
Apang kun e-angot ang pamilya Zayco sa Alvarez, ini ang magpakaduwa bangud ang amay ni Alvarez kag iloy ni Zayco ang magpakaisa, suno kay Isidro Zayco sa isa ka interview sa Bacolod sang Setyembre 15.
Si incumbent mayor Benjie Miranda naman ang magapapili sa iya ika-duwa nga termino, sa diin iya mangin running mate amo ang iya asawa nga si Divina Superal-Miranda. -BNFM Kabankalan
