HUGTANAY og bakus ug nanghinaut na lamang nga makalahutay ang fishing industry sa GenSan tungod sa nagpadayung pagtaas sa presyo sa produktong petrolyo.
Kini ang gibutyag ni Dominic Salazar, presidente sa Socsksargen Federation of Fishing and Allied Industries, Incorporated kun SFFAII nga kasamtangan medyo nagkalisod na ang fishing industry, lakip na sa mga negosyante ug mananagat tungod sa oil price hike.
Kasamtangan, aduna matud pay ubang dagkong panagatan nga didto sa high seas pocket one sa international waters nananagat apan lakip sila ang naglisod tungod nadoble na ang presyo sa fuel.
Anam anam na untang nakabawi ang fishing industry gikan sa pandemya apan naapektohan na usab tungod sa walay puas nga pagsaka sa presyo sa lana.
Bugtong hangyo niini nga kung dili man mahatagan og ayuda, temporaryo unang suspendihon ang excise tax o uban pang buhisan samtang nasinatian ang pagtaas sa presyo sa produktong petrolyo.
Una nang gibutyag ni Salazar nga ang operasyon sa fishing halos, anaa sa 60 hangtud 70 percent ang nag-agad sa fuel ug tungod sa pagtaas sa presyo, dako ang epekto kanila.
