LEGAZPI CITY – Kinumpirmar kan Department of Public Works and Highways (DPWH) Bicol na natapos na an nasa P35M na farm-to-market roads na nagkokonektar sa tulong banwaan sa primier distrito kan Albay.
Sa report kan nasambit na ahensya, pigkokonektar kaini an mga dalan kan Brgy. Sta. Miscericordia kan Sto. Domingo, Brgy. San Roque sa Malilipot asin Brgy. Bayandong kan Bacacay.
Katakod kaini, nagtutubod si District Engineer Rainero Zerda na magdadara ki dakol na mga turista asin mga negosyante an pagtatapos kan tinampo nganing bisitahon ini na iyo man an mapauswag kan turismo, agrikultura asin marine industries nin huli ta konektado ini sa manlain-laing mga beach resorts sa nasambit na mga banwaan.
