NAGKUTLO sa kinabuhi ang usa ka lalaki, kini basi sa report sa San Isidro Police station, nahitabo ang insidente Agosto 5 sa gabei, ug ang biktima naila nga si Roland Quezon, 21-anyos, ulitawo, family driver ug nagpuyo sa Purok Malipayon, Odi Compound, Brgy. San Isidro, GenSan.
Subay sa taho sa kapulisan alas 9 sa gabei nahitabo ang insidente sa mismong gipuy-an sa biktima. Basi sa gihimong imbestigasyon sa otoridad usa ka kaubanan sa biktima nga nagpangalang Nelyn Bongcac ang nakakita kang Quezon nga nagdali-dali pasulod sa master’s bedroom bitbit iyang itom nga sling bag.
Milabay ang pipila ka minuto nakadungog nalang si Bongcac nga adunay buto sa pusil, dali niya kining giadtuan ug nakita na lamang ang biktima nga naghigda sa salog sulod sa CR nga nagkadugo ug adunay armas sa iyang tapad. Pagkahuman dali nilang gidala sa Doctors Hospital si Quezon aron patambalan.
Apan pagka Agosto 7 sa buntag gideklara sa doktor nga patay. Samtang narekober sa kapulisan gikan sa nahitaboan ang usa ka unit sa caliber 45 nga armas, usa ka steel magazine nga may unod siyam kabook nga bala sa caliber .45 nga armas. Lakip narekober sa kapulisan gikan sa lugar ang usa ka .45 cartridge caliber case, sling bag nga adunay unod nga duha ka cellphone, ug usa ka steel magazine nga may unod nga 16 kabook nga bala sa caliber 45 nga armas, usa ka holster nga itom, mga susi. Dugang pa sa mga butang sa biktima nga nakuha sa kapulisan ang usa ka kutsilyo, perfume, pitaka, mga IDs, ug kwarta nga mikantidad sa P3,545. Gisumite na sa kapulisan sa Regional Forensic Unit-12 ang mga bala ug armas nga narekober alang sa ballistic examination. Samtang ang lawas sa biktima ipailalom matud pa sa paraffin examination. Gisulayan og hinabi sa Brigada ang pamilya apan sumala sa guwardiya sa balay nagdumili silang mohatag og impormasyon kalabot niini.
