Ibawal na sa lokal nga panggamhanan sa dakbayan sa Davao ang paglusad og face-to-face non-essential events sugod Mayo 26, 2021.
Base sa gipagawas nga Executive Order, ang paglusad og Barangay, Local ug National Government Office Events lakip Government-Owned and Controlled Corporation Events ang gidili samtang gipailawum sa state of calamity ang nasud.
Partikular nga gipunting ang mga aktibidad sama sa inauguration; anniversary; thanksgiving; ribbon-cutting; blessing; turnover; groundbreaking activity; launching program; salo-salo; birthday; press conference; oath taking program; photo opportunity; retirement honors; welcome honors; testimonial program; summer outing; ug ubang susamang aktibidad apan pwede ra ilusad via virtual.
Lakip gidlli ang face-to-face non-emergency essential government activities sama sa trainings ug seminars hangtud August 31, 2021 apan giklaro nga mamahimong makapahigayon sa susamang kalihukan pinaagi sa online platforms.
Samtang ang tanang disaster ug emergency activities apil na ang distribution sa financial, food and non-food items ang tugutan.
Alang usab sa food and non-food items distribution nga dili konektado sa disaster o emergency event, kinahanglan kini himoon house to house o contactless delivery sa mga organizer nga walay matigayong mass gathering.
Ang maong kamanduan nagtumong mapugngan ang nagkagrabe nga pagsaka sa COVID-19 cases sa syudad. BNFM-DAVAO
