Gikatakda nga magpasaka og kaso ang pamilya sa estudyante kinsa naligsan kagahapon sa alas-9:10 sa buntag, Nobyembre 6, 2023, sa Km 20 Crossing 20 Brgy Los Amigos, Tugbok Dist., Davao City.
Nasayran pinaagi ni Davao City Police Office spokesperson PCapt. Hazel Tuazon, nga na-coma ang biktima nga nailang si alyas Christine, 19, estudyante sa Holy Cross College of Calinan ug residente sa Purok 3A, Los Amigos, Tugbok Dist.,Ning syudad.
Sa imbestigasyon sa Los Amigos Police Station, gisubay sa Suzuki Dropside Pick-up ang Davao-Bukidnon Road ug padulong sa Mental.
Pag abot sa lugar diin nahitabo ang insedente, aksidenteng nabanggaan niini pedestrian/biktima samtang nitabok kini sa pedestrian lane.
Nakaangkon og head injuries ang biktima hinungdan nga dali kining gidala sa Southern Philippines Medical Center (SPMC).
Apan kagabii, gibahibalo sa DCPO nga na-coma ang nasangpit nga biktima.
Samtang, ang driver sa Pick-up nga si Joel Gamas Confessor, 40, ninyo, fish vendor ug residente sa Purok 20, New Loon, Mintal, Tugbok Dist.,anaa na gikustodiya sa Los Amigos PNP, samtang gikatakdang pasakahan karon og kasong reckless imprudence resulting to serious Physical Injury.
