Nakaangkon og samad-dinunggaban sa likod ang usa ka lalaki sa dihang nabiktima sa tulis ala-1:00 sa kadlawon kagahapon sa Tagum Public Terminal.
Subay sa post sa usa ka Rissa Jean Diez, wala gayud sumala pa magtuo ang igsoon niining si alyas Kokie nga mahidangat kini sa maong panghitabo.
Sumala pa nga pauli na unta ang maong biktima sa ilang panimalay sa New Corella dihang kalit na lamang kini nga giduol sa usa ka wala mailang indibidwal aron tulison.
Tumong sumala pa sa maong suspek nga makuha ang gikuptan niining cellphone.
Nagmagahi ang biktima sa paghatag iyang cellphone, hinungdan aron mibunlot og mahait nga butang ang suspek ug giduslak sa tulo kahigayon ang likod sa maong estudyante.
Dugang pa ni Diez, nakahiagum matud pa karon og malawom nga samad ang igsoon niini, hinungdan aron kinahanglan kining ipailawom sa operasyon.
