NAA pa lang sa 39.3 percent o 63,000 ang nakapa-enrol alang sa school year 2022-2023, kini ang gibutyag ni Romelito Flores, Schools Division Superintendent sa Department of Education (DepEd) sa GenSan.
Matud ni Flores, naa lang usab sa 38.1% o 7,600 ang nakaenrol sa mga pribadong tulunghaan sa siyudad. Giangkon niini nga naa sa 177,000 enrollees ang gilaoman nilang motungha alang sa taliabot nga school year.
Kahibaloan nga nagsugod na ang enrollment atong Hulyo 25 ug hangtud kini sa Agosto 22. Giawhag ni Flores ang mga ginikanan o guardian nga magpaenrol tungod daghan og paagi sa pagpalista sa mga learners. Sama sa online ug nagbutang na sila og mga drop boxes sa mga mall ug palengke sa GenSan. Migamit na usab og traysikel ang DepEd aron mohatud sa mga porma nga magamit sa pagpa-enrol.
Nakalabay’ng tuig, misaka sa 180,000 ang nalista nga learners sa DepEd. Una nang, gitakda ang full implementation sa face-to-face classes sa Nobyembre. Nagpahigayon na usab ang ahensiya og Brigada eskwela isip pagpangandam sa pagbalik sa mga magtutungha sa Agosto 22. I Richel Gubalani
