MIUBOS og 60 porsyento ang kaso sa dengue fever sa GenSan ug mihuman sa ‘cycle’ sa pagsaka sa ihap sa pasyente sulod sa tulo katuig. Matud ni Dr. Lalaine Calonzo, assistant department head sa City Health Office (CHO) kini gumikan sa pagpakusog nila sa kampanya batok sakit.
Sama sa pakusog sa 4s strategy ug dengue operation kulob nga gipakanaog na sa matag purok. Dako usab og natabang ang kanunay nga pagpahimangno sa mga health authorities sa publiko kalabut sa pagpanglimpyo sa palibot.
Kasamtangan, nakatutuk ang mga sakop sa operasyon batok dengue sa Barangay Labangal nga nakatala og labing taas nga kaso sa sakit. Nagmugna usab og misting teams ang CHO nga gipakatag sa mga barangay aron moguba sa mosquito-breeding sites ug nanghatag og mga dengue-prevention leaflets. Ang maong barangay ang nakatala og 60 o 16% gikan sa 377 total dengue case sa GenSan.
Dugang ni Calonzo pipila na ka semana nga wala’y natala nga namatay tungod sa dengue. Hinungdan nga nagpabilin sa pito ang narekord nga patay sa sakit gikan Enero hangtud sa kasamtangang bulan. Nakalabay’ng tuig susamang panahon nakatal ang GenSan og 941 dengue cases ug walo ang patay. I Richel Gubalani
