Mipasalig ang Misamis Oriental Provincial Police Office nga paningkamotan nila nga mapakgang ang panghitabo sama sa mga election related incident ning opisyal nga pagsugod sa local campaign period alang sa May 9, 2022 National and Local Election.
Gibutyag ni PNP-Misamis Oriental Spokesperson Police Lt. Theofratus Pia nga hugot ang pagsunod sa mga chief of police, ground commander ug sa tanang pwersa sa kapolisan sa lalawigan sa direktiba ni Provincial Director Police Colonel Raniel Valones alang sa pagpatuman sa mga lakang aron mapugngan ang kriminalidad panahon sa piliay.
Subay niini, alerto karon ang boundary border checkpoints labi na sa lungsod sa Magsaysay, Tagoloan, ug Amoros, El Salvador ug ang comelec checkpoint sa matag munisipyo ug syudad sa lalawigan.
Gani sa pagpatuman sa checkpoint ug comelec gun ban, ubay-ubay na nga mga armas ang nakompiska, kalakip pa niini ang eksplosibo diin 11 ka mga indibidwal ang nasikop ug napasakaan sa kaso. Hinuon sa karon, walay natala nga dagkong insidente kalabot sa eleksyon ug padayon ang koordinasyon sa kapolisan sa Armed Forces of the Philippines ug intelligence community.
