Dili magresulta sa pagbalik sa Enhanced Community Quarantine (ECQ) status ang natala nga Delta Variant cases sa Davao Region.
Nagtuo si Health Officer Dr. Arnel Florendo, kasamtangang mga protocol pa gihapon ang angay ipatuman ug sundon sa luyo nga dunay duha ka delta variant sa COVID-19 nga lakip sa 79 ka variants of concern nga nasuta gikan sa 835 specimens sa Davao region nga gipailawum sa Whole Genome Sequencing sa UP-PGC.
Kahibaluang base sa pahayag sa DOH-XI ang maong mga kaso nga natala sa Tagum ug Davao City gikan sa specimen sa milabayng Hunyo 17 ug 26 ang hingpit nang nakarekober sanglit ayha pa man nigawas ang resulta sa sequincing sa miaging July 24, 2021.
Ang maong usa ka empleyado sa Bureau of Fire Protection (BFP) nakarekober na ug mibalik na sa iyang pagpanarbaho nga dunay 16 close contacts.
Sa pagkakaron moabot na sa 1893 specimens gikan sa Davao Region ang napadala sa UP-PCG alang sa whole genome sequencing ug dako ang posibilidad nga duna pay variants of concern ang madiskubrihan gikan sa maong mga sample.
Tungod niini taud-taud na matud pa nga anaa na ang presensya sa maong variant sa Davao region apan wala lamang nadiskubrihi sa mga specimen nga gipadala sa RESU sa PGC sa milabayng mga bulan.
Kahibaluang una nang gibutyag ni Davao City Mayor Sara Duterte-Carpio nga dili imposible nga makasulod sa Davao City ang Delta variant sanglit wala pa lang kini nadiskubrihan pinaagi sa pagpadala og specimen sa Philippine Genome Center.BNFM-DAVAO
