Sangka 46 anyos nga eaeaki nga taga Nabas, Aklan ro nadakpan bangud sa pag eabag sa Municipal Ordinance No. 2022-05, Section 1A-01 o Illegal Fishing sa banwa it Nabas.
Kaeakip sa nasambit nga operasyon ro miyembro it Nabas Municipal Aquatic Office nga kung siin ro suspek hay nadakpan sa aktong nagapangisda sa baybayon it Brgy. Buenasuerte, Nabas, Aklan nga owa it permit halin sa LGU Nabas.
Nakumpiska man it mga kapulisan ro sangka baroto nga nagabalor it P60,000, pilang kagamitan sa pagpangisda nga nagabalor it P10,000 ag mga isda nga nagabalor it P1,000.
Ro suspek hay gin-isyuhan it Nabas Municipal Aquatic Office it citation ticket sa pag eabag sa ordinansa. / ANN DESLENE SALAZAR
