Nakumpiska sa mga sakop sa Davao City Police Office (DCPO) ang dul-an dos milyones kantidad sa gituohang shabu sulod sa usa ka semana nga anti-illegal drug operations, gikan Mayo 19 hangtod Mayo 25 ning kasamtangang tuig.
Nunot kini sa padayong paningkamot sa kapulisan sa kampanya batok iligal nga droga sa dakbayan sa Davao. Sa datus, malampusong nasikop ang 48 ka drug suspek atol sa 41 ka operasyon, diin nakumpiska ang 285.012 grams sa gidudahang shabu nga mubalor sa Php1,938,081.60 ug Php31,746.00 sa marijuana.
Balhog na karon sa prisohan ang mga nahisgutang suspek ug gihikay na ang tukmang kaso nga ipasaka batok kanila.
Samtang gipaniguro sa DCPO nga ang kalinaw ug kahapsay magpabilin nga nag-unang prayoridad alang sa seguridad ug kaluwasan sa tanang Dabawenyo.
Gipasalig usab sa DCPO nga magpadayon sila sa pagpahigayon og mga operasyon aron mahatagan og hustisya ang mga indibidwal nga nalambigit sa ilegal nga kalihokan.