BICOL – NAGPAPADAGOS an asistensya kan Department of Social Welfare and Development o DSWD para sa mga indigent o tios na senior citizens sa nacion sa paagi kan saindang social pension program.
Segun sa DSWD-Bicol, base sa reglamentos kan saindang ahensya asin segun sa Batas Republika Bilang 9994 o Expanded Senior Citizens Act of 2010 (ESCA), bukas an programa sa mga may edad sisenta anyos o pataas basta an mga ini an laog sa mga ipigtalaan na kwalipikasyon.
Kinakaipuhan an sarong benepisyaryo an mayong pigreresibing pensyon gikan sa Government Service Insurance System (GSIS), Social Security System (SSS), Philippine Veterans Affairs Office (PVAO), Armed Forces and Police Mutual Benefits Association, Inc. (AFPMBAI) o iba pang insurance agency; mayong permanenteng income; may helang o kakundian asin mayong regular na nareresibing suporta gikan sa pamilya o partidaryos para sa saiyang pangenot na pangangaipo.
Padagos man na pig iingganyar kan DSWD-Bicol an mga mawot maging benepisyaryo na makipagkoordinar sa pinakaharani nindang oficina tanganing mag sairarom sa evaluation asin assessment.
Gabos na kwalipikadong benepisyaryo kan programa an maresibe nin mil kinyentos tuyong payout kun saen puon ngani ngunyan na taon, ipigtalaan an pananao kan nasabing monthly stipend kan mga pensioners kada quarter o tuyong ikatolong bulan.
