CAMARINES NORTE- Nasamsam ng mga awtoridad ang iligal na droga baril at mga bala sa isinagawang buy bust operation laban sa isang miyembro umano ng Gutierez drug syndicate sa Purok-1, Barangay Tawig, Paracale, Camarines Norte noong Sabado ng hapon.
Sa ulat ng Paracale Municipal Police Station kinilala lang ang suspek sa alyas na “Jojo” 50,na isa ring bet collector ng small town lottery (STL) at residente sa nabanggit na lugar.
Nakuha sa nasabing operasyon ang isang piraso ng maliit na selyadong plastik na pakete ng hinihinalang shabu at isang improvised na maliit na container na nabalutan ng kulay itim na electrical tape na naglalaman ng apat na piraso ng selyadong plastik na pakete ng hinihinalang “shabu.
Tinatayang umaabot sa timbang na humigit kumulang 0.3 gramo ang mga nasamsam na iligal na droga na umaabot sa halagang Php 2,000.00.
Narekober din sa nasabing operasyon ang isang sling bag na naglalaman ng hinihinalang kalibre 38 rebolber na kargado ng tatlong bala.
Nasa kustodiya ng Paracale Municipal Police Station ang suspek at ang mga nakuhang ebidensya para sa kaukulang disposisyon.
Sa isang pahayag sinabi ni Camarines Norte PNP Provincial Director PCol Julius Guadamor na hindi titigl ang PNP sa paglulunsad ng mga operasyon kontra iligal na droga na parang anay umano na unti-unting sumisira sa kinabukasan ng mga kabataan.
