Patay ang driver sang motorsiklo matapos bumunggo sa nagaparking nga truck sa Brgy. Cogon, Panitan, Capiz takna alas 6:20 kagab-i sang Lunes, Disyembre 11.
Ginkilala ang napatay kay alyas Rio, 46-anyos, wilder kag residente sang Brgy. Bahit sa nasambit nga banwa.
Samtang ang driver sang truck amo si alyas Emmanuel, 24-anyos, residente naman sang Brgy. Poblacion, Pres. Roxas.
Sandig sa imbestigasyon sang Panitan Municipal Police Station, nagikan sa Pontevedra ang truck nga may karga nga tubo kag pagadal-on ini sa syudad sang Passi.
Ginapahayag nga nagpundo ang amo nga truck sa may kilid sang karsada malapit sa restaurant bangud manyapon ang driver sini kun sa diin gin-hazard niya ang salakyan.
Apang, ginkakibot nalang sini sang hinali lang may lumagapok kag didto nakita nga bumunggo ang XYM nga motorsiklo nga ginamaneho ni alyas Rio.
Bangud sa impact sang pagkabunggo, nag-angkon sang patal nga pilas sa ulo kag iban nga parte sang lawas ang biktima.
Nahibaluan nga nagikan sa banwa sang Maayon si alyas Rio kag pauli na kuntani sa ila puluy-an, tungod sa madulom kag madanlog nga karsada nag-alang alang ini sa truck.
Madasig naman nga ginpadangat sang Panitan MDRRMO sa Bailan District Hospital ang biktima apang ini ang gindeklara sang doktor nga dead on arrival. | Judy Ann Juare
