Nagpanugyan ang Capiz Provincial Health Office sa mga pumuluyo nga likawan ang pagkaon sang mga unhealthy foods subong nga holiday season.
Sa interview sang Brigada News FM Roxas City kay Mr. Jeofrey Espiritu, tagpamaba sang Capiz-PHO, iya ginpahayag nga may yara sang programa ang Department of Health nga may tigulo nga Biyaheng Kalusugan: Ligtas Christmas para sa Healthy Pilipinas 2023.
Suno kay Espiritu, ginakampanya nila sa karon ang “Healthy Handaan”, “Healthy Celebration” kag ang “Iwas Paputok”
Sa “Healthy Handaan”, ila gid ginapanugyanan ang mga pumuluyo nga magkaon sang balance, mag-inom sang madamo nga tubig, likawan ang mga matam-is nga pagkaon, likawan man ang makahulubog nga ilimnon kag ugalion nga mag-exercise.
Dugang pa ni Espiritu, sa pagselebrar sang Christmas dapat likawan ang food poisoning ukon mga pagkaon nga kontaminado sang mga bacteria nga posible tunaan sang sakit sang tyan, dapat mangin mahinalungon sa pagpili sang pagkaon ilabi na sa aton mga ginaluto.
Sa “Healthy Celebration”, ugalion nga magsuksok sang face mask kun ginasip-on kag ubo agud malikawan nga makatapon sa makasalamuha nga tawo kag masami nga maghugas sang kamot.
Sa “Iwas Paputok”, magamit na lamang sa iban nga pampagahod kag likawan nga magpalupok sang anuman nga sahi sang palupok agud mapalayo sa disgrasya. | Judy Ann Juare
