Patay ang driver sang motorsiklo matapos bumunggo sa Toyota Hilux sa Brgy. Dayhagon, Sigma, Capiz takna alas 10:05 kagab-i sang Lunes, Oktubre 16.
Ginkilala ang napatay kay alyas “Joshua”, 23-anyos, residente sang Sitio Bombahan, Brgy. Balucuan, Dao.
Samtang ang driver sang salakyan amo si alyas “Abel”, 55-anyos, residente sang Brgy. Cagay, Roxas City kag isa ka katapo sang Philippine National Police, na-assign sa 2nd Provincial Mobile Force Company sa Brgy. Manhoy, Dao.
Sandig sa imbestigasyon sang Sigma Municipal Police Station, nagikan ang salakyan nga ginamaneho ni alyas “Abel” sa banwa sang Mambusao kag magapadulong nga kuntani sa ila istasyon sa Brgy. Manhoy, apang pag-abot sa lugar nga ginluntaran sang aksidente, ginapahayag nga naglapaw sa linya ang kasugata sini nga Rusi motorsiklo nga ginamaneho ni alyas “Joshua” kun sa diin magapadulong man kuntani sa banwa sang Sigma.
Bangud sa mabaskog nga impact sang pagkabunggo, nag-angkon sang patal nga pilas si alyas “Joshua”.
Ginpadangat pa ini sa Dao District Hospital apang ini ang gindeklarar sang doktor nga dead on arrival.
Ginkustodiya sa Sigma PNP si alyas “Abel” lakip na ang mga salakyan nga naulamid sa aksidente para sa nagakaigo nga disposisyon. | Judy Ann Juare
