KABANKALAN CITY, Negros Occidental — Sa tunga sang panawagan sang pamilya Macayaran sang hustisya para sa ila himata nga ginbunggu-an sang canter, naga padayon sa gihapon nga gina-imbestigahan kag gina-pangita sang mga kapulisan ang driver sang salakyan nga nag “hit-and-run” kay Jonathan Macayaran.
Pahayag ni Police Captain Anthony Saying, deputy chief of police sang syudad sang Himamaylan, padayon pa nila gina-usoy ang mga Closed-Circuit Television (CCTV) sa may yara sa syudad kag banwa sang Binalbagan, agud ma-hibaluan ang plate number sini kag mabal-an ang naaga-maneho sang salakyan sang natabo ang aksidente.
Dugang pa ni Saing, nga may yara na sila isa ka kopya sang CCTV, sa diin nakit-an ang plate number sang salakyan, apang ini ang gina-kumpirmar pa sa iban nga mga CCTVs. Kag kun matigayon nga ma dakpan ang driver sini, maga-pangatubang ini sang kaso nga reckless imprudence resulting to homicide.
Suno pa sa police nga kargado sang sandiya kag tawo ang canter nga naka-bunggo kay Jonathan Macayaran, pasado las-5 sang hapon, Sabado nga adlaw, Mayo 18, sa National Highway sang Barangay Aguisan, Himamaylan.
Samtang, suno naman sa kamagulangan nga bata ni Jonathan nga si Shyne, dapat mag sungka na kag bayaran sang driver sang canter ang ginhimo niya sa iya amay nga pag hit-and-run.*