WALA na makasuhan ang driver sa sakyanan nga nabanggaan sa motorsiklo sa Fil-am Road, Barangay Fatima, General Santos City.
Sa progress report sa Traffic Enforcement Unit kon TEU adlaw nga Biyernes naghusay ang amahan sa batan-ong nga namatay sa bangga kuyog ang uyoan ug si Rico Espania, driver sa sakyanan.
Nagkasabot ang duha ka kampo nga maghatag og tabang pahasubo si Espania ngadto sa pamilya sa namatay ug dili na sila mopasaka og kaso.
Kahibaluan nga sa unang paghinabi sa Brigada sa driver gisulti niini nga wala gayud siyay sala kay anaa siya sa husto nga lane unya hinay ang iyang padagan, samtang ang motorsiklo nilikay sa naunang sakyanan ug didto naigo sa iyang sakyanan.
Namahayag usab ang amahan sa batan-on nga si Richard Barbasan nga posible nga nasilawan sa suga ang iyang anak mao nga wala nakakita sa sakyanan. I Ver Diazon