PATAY ang 28 anyos nga driver sa motorsiklo human nga nabagnos pila ka metros sa dihang misulay kini og overtake sa truck niadtong alas-11:40 Sabado gabii sa C.P. Garcia Hiway, Brgy Communal ning syudad.
Sa inisyal nga imbestigasyon sa Buhangin Police Station, gisubay sa motorsiklo ug truck nga gimaneho ni Francisco Valiente Alagdon, 39, nga taga-Mabuhay General Santos City ang C.P. Garcia Hiway, Brgy Communal padulong South, sa dihang pag abot sa lugar diin nahitabo ang disgrasya, ni-overtake ang motorsiklo sa truck apan nibangga kini sa center island.
Gumikan sa kakusog sa impact, nalagpot ang driver sa motorsiklo nga si Ariel Abardonido Peligro, 28, lumad nga taga- Cervantes St. Monkayo Davao de Oro. Napasok kini ilalom sa truck ug nabagnos kinse ka metros ang gilay-on.
Daling girespondihan sa Central 911 ang nahitabo, apan gideklarang patay diha-diha dayon ang driver sa motorsiklo.
