Gitanggong karon sa prisohan ang drayber sa Ceres Bus ug gipaabot nga mapasakaan og kasong reckless imprudence resulting to homicide human nga nakabsan sa kinabuhi ang motorista nga nadasmagan sayo sa buntag, Mayo 6, 2024 sa Mc. Briones Street, Brgy. Jagobiao, dakbayan sa Mandaue.
Nasayran nga ang nagmaneho sa bus, giila nga si Rodney Juanillo, 49-anyos, lumulupyo sa Tabogon Cebu. Samtang ang nagmotorsiklo nga nabanggaan patay mao si Mark Anthony Sumatra Mabayo, 24 anyos residente sa Jugan, Consolacion.
Niangkon ang driver sa bus nga sa dihang nagtungas na siya sa may Jagobiao, Mandaue City kalit lang nisarasay ang bus nga iyahang gimaneho tungod sa ka dangog sa karasada gumikan sa pag-bundak sa ulan hinugdan nga nibangga kini sa biktima.
Tungod sa kakusog sa panagbangga, nalagpot ang biktima og na bunal sa karsada hinungdan sa iyahang kamatayon. Kasamtangan nga gitanggong sa Mandaue City Police Office ang driver sa Ceres Bus.
