NAGBUY-OD na sa dihang naabtan sa Brigada News Team ang usa trisikad driver human nga nalambigit sa bangga pasado alas 10 ang takna sa buntag sa national highway Barangay Ligaya, Gensan.
Giila ang biktima nga si Jerry Apero, hamtong ang panuigon nga residente sa Barangay Ligaya. Samtang giila ang driver sa kotse nga si Ronan Languyan. Subay sa pakighinabi sa Brigada News Team sa mismong driver sa kotse gibutyag niini nga gikan siya sa Area sa Barangay Lagao ug mupadulong sa Davao City sa dihang pag abot sa National Highway atubangan sa VSM Estate may nigawas matud pa na kotse nga kung asa nakita niyang nihunong rason nga mipadayon kini sa pagmaneho, apan wala damha niini nga mukalit og U-turn ang tri-sikad rason sa pagbangga.
Gidali man usab og dala sa balay tambalanan ang biktima human nahimong nakaagkon og head and body injury sa kalawasan. Samtang andam man mutubag sa galastuson ug damyos ang driver sa sakyanan ug gibutyag nga disgrasya lamang ang nahitabo. Gitugyan na sa Traffic Enforcement Unit Gensan ang imbestigasyon kalabot sa maong insidente samtang temporaryong gikustodiya sa ilang buhatan ang mga nalambigit na behikulo. MJ Fernandez
