LEGAZPI CITY – Inako kan Department of Public Works and Highways (DPWH) Bicol na resbonsibilidad ninda an pagpapakarhay kan mga tinampo na proyekto sa rehiyon orog na an mga madaling maraot.
Segun kay DPWH Bicol Regional Spokesperson Lucy Castañeda, dae dapat pagbasulon an mga contractor huli ta igwa nin project engineers na masagibo nin inspeksyon.
En kaso su boot na may nahiling nin deperensya o dae nasunod sa plano, kinakaipohan liwat na ayuson kan contractor alagad wara na ini nin additional expenses.
Segun pa kay Castañeda, kaipohan sana magin mahigot an saindang ahensya sa pag-inspeksyon sa mga proyekto siring kan tinampo tanganing bako na taon-taon an pag-irahay kan mga ini.
